Prosječna plata samo za voće, cijena trešanja od 30 do 40 eura
Ako bi svaki dan pošli na pijacu i kupili kilogram trešanja po trenutnim cijenama bilo bi potrebno izdvojiti preko 900 eura mjesečno što je skoro na nivou prosječne plate u Crnoj Gori.
Paprene cijene voća na pijacama. Kilogram trešanja početkom druge polovine marta košta od 30 do 40 eura.
Iako prodavci kažu – trešnje pojeftinile za pet eura, na pijaci u Baru rijetko se mogu kupiti. Ne zato što su jeftinije. Trešnje su i dalje preskupe pa ih prodavci rijetko nabavljaju.
Na barskoj pijaci skoro da nema kupaca. To potvrđuju i fotografije Primorskog portala u jutarnjim satima prvog radnog dana ove sedmice.
Za kilogram jagoda potrebno je izdvojiti od pet do sedam eura. Fortunele, pipun, kesten su po sedam eura, kruške oko pet eura, duplo jeftiniji mandarine i domaći limun. Najjeftinije su jabuke i banane koje koštaju oko dva eura.
Na pijaci kraljevski mango košta 10 eura, obični tri eura koliko košta i avocado.
Bogata ponuda, preskromna potražnja- slika crnogorskog standarda.
