Uklonjeno beživotno tijelo morske kornjače sa barske plaže

Radnici Komunlanog preduzeća jutros su sa barske plaže kod ušća rijeke Željeznice uklonili beživotno tijelo  morske kornjače.

Uginulu  morsku kornjaču, zaštićenu vrstu  glavata želva (Caretta Caretta),  na plaži su uočili građani u subotu. Uzrok uginuća kornjače za sada nije poznat. Tijelo je uočeno na barskoj plaži dan nakon jakog juga pa se pretpostavlja da su ga veliki  talasi izbacili na obalu .

Tijelo uginule kornjače na plaži tokom vikenda izazvalo je nelagodu, tugu građana.  

-Tijelo kornjače je pronađeno u zoni Morskog dobra. Prema procedurama nije moglo biti uklonjeno dok nadležni iz Morskog dobra ne sačine zapisnik. Jutros oko 9 sati su radnici Komunalnog sa plaže uklonili  tijelo uginule kornjače, rečeno je Primorskom portalu u Komunlanom preduzeću.

Kornjača je bila teška oko 30 kilograma. Podsjetimo, u junu je na budvanskoj plaži pronađena  uginula kornjača   nakon jakog nevremena. Prije dvije godine, beživotno tijelo kornjače teške oko 50 kilograma uklonjeno je sa plaže na Velikom pijesku.

Jadransko more je  uz zaliv Gabes u Tunisu, jedno od dva najvažnija morska staništa za glavatu želvu (Caretta caretta) u Sredozemlju. Morske kornjače, želve  su među  najstarijim i najugroženijih organizama na svijetu.