Predškolci priredili razigrano i raspjevano putovanje kroz razne države svijeta

Sonja Jovanović 01.12.2022 21:30

„Hajde, svijete, budi dijete“ naziv je manifestacije kojom je JPU „Vukosava Ivanović Mašanović“ obilježila Svjetski dan djeteta i Dan opštine Bar. Mališani iz predškolskih grupa svih vaspitnih jedinica ove predškolske ustanove, priredili su publici divno, razigrano i raspjevano putovanje po globusu.

Priredba je održana u utorak i srijedu veče, a na bini Doma kulture u Baru se, pored vaspitača, našlo oko 350 mališana, koji su se publici predstavili koreografijama koje oslikavaju razne države svijeta – Crna Gora, Njemačka, Meksiko, Indija i na kraju poručili da „ništa više nije važno, ako voliš snažno“.

„Djevojčice i dječaci su se predstavili pjesmama i igrama iz raznih dijelova svijeta i poručili da smo na ovom svijetu svi isti, a opet različiti. Program je završen recitacijom „Ljubav će pobijediti“, i pjesmom koja nosi snažnu poruku najmlađih da ‘ništa nije važno ako voliš snažno!’“, poručili su iz JPU Vukosava Ivanović Mašanović.