Napadač Arsenala Ivan Bulatović: Cilj je osvajanje Kupa
U prvoj utakmici Tivćani su kao gosti savladali Iskru 3:1
Tivatski Arsenal napravio je veliki korak ka plasmanu u finale Kupa, nakon što je u prvoj utakmici polufinala u Danilovgradu savladao Iskru rezultatom 3:1.
Atmosfera u ekipi je zaista fenomenalna, forma je u usponu, a igrači su ušli u taj pobjednički mentalitet, opravdano jer im zadnji rezultati to daju za pravo. Moglo bi se reći čak da atmosfera nikad nije bila bolja, bar od kada su Tivćani postali prvoligaši.
Gotovo na svakoj utakmici vidi se napredak u njihovoj igri i imaju razloga da budu optimistični u Kupu, ali i u prvenstvu.
Junak pobjede protiv Iskre, dvostruki strijelac Ivan Bulatović, kome je ovo bila možda i najbolja partija u dresu tivatskog prvoligaša, kaže:
– Odigrali smo odlično i postigli rezultat koji nam može olakšati put do finala. Ipak, moramo biti oprezni, i naravno da neće biti opuštanja u narednih 15 dana kada se očekuje revanš. Mi i u revanšu imamo ulogu favorita i nadam se da ćemo je opravdati. Cilj nam je ulazak u finale, ali zašto da ne i osvajanje Kupa, a na taj način bi se domogli i Evrope.
