Kriza vlada, ali uglavnom se ima novca za znak pažnje

Sonja Jovanović 08.03.2023 15:18

Prodavci cvijeća i cvjećare u Baru i ove godine pripremili su bogatu i raznovrsnu ponudu cvijeća i cvjetnih aranžmana. Na raznim lokacijama u gradu, danas na desetine prodavaca, a ponuda zanimljiva i raznovrsna – od karanfila i ruža do bogatih buketa. Ekonomska kriza vlada, ali, kako su nam kazali prodavci, uglavnom se ima novca za znak pažnje.

Cvijeće se može kupiti po cijenama od 1 euro do preko 60.

„Uglavnom ljudi kupuju korpice, koje su po 6, 7 eura, bukete od pet eura. Pripremili smo razne velike cvjetne aranžmane, po cijenama od 20, 30, 65 eura… Sinoć smo prodale dosta korpica od 35, 40 eura. Interesovanje je bilo veliko i danas juče, kiša nas je iznenadila, malo nas je omela“, kazala je za Primorski portal jedna od prodavačica, koja je i prethodnih godina pripremala štand za Osmi mart.

Na pitanje da li se osjeća ekonomska kriza, prodavci su nam dali različite odgovore – neki kažu da kriza vlada i da je kupaca manje nego ranijih godina, dok se na štandovima drugih prodavaca kriza ne osjeća, naprotiv.

„Imam karanfile, ruže i margarete. Cijene se kreću od 1 do 3 eura. Cijene jesam blago uvećale, zbog cijene nabavke. Duži niz godina prodajem cvijeće za Osmi mart, interesovanje je vidno manje, jako se osjeća kriza“, kazala je jedna od prodavačica.

Naša mlada sugrađanka Samra Erović kaže da uprkos uvećanju nabavnih cijena, cvijeće prodaju po cijenama kao i prošle godine.

„Karanfili su jedan euro, šarene ruže 1.5 euro, crvene 2 eura. Drastičnih razlika u odnosu na cijene od prošle godine nije bilo, kažu nam da smo danas najjeftiniji ovdje. Imamo posla, stvarno smo zadovoljne. Kod naših kupaca se kriza ne osjeća“, kazala je Erović.