Dado Topić i Ana Petan pobjednici Festivala „Biser Jadrana“

Dodjeljivanjem nagrada na Ljetnjoj pozornici u Tivtu sinoć je završen muzički festival “Biser Jadrana”. Pobjednici festivala su Dado Topić i Ana Petan sa pjesmom “Nebo”. Njima je uručen Zlatni biser. Andrijana Božović” je osvojila drugo mjesto i Srebrni biser sa pjesmom “Dobro je”.

Grupa Makadam sa pjesmom “Tajno, tajnije” bila je treća i osvojila Bronzani biser.

Odličan nastup imala je Tivćanka Mirjana Vukanović – Mike sa pjesmom “Hijene” koja je osvojila četvrto mjesto. Nagrade je uručio predsjednik opštine Željko Komnenović. Ostale nagrade uručio je Bojan Delić, direktor festivala.

“Biser Jadrana je most prijateljstva” – ocijenili su članovi žirija. I bili su u pravu. Lijepa slika iz Tivta obišla je region. Pjesme sa festivala će se tek slušati.

„Ljudi još uvijek osjećaju emocije i spremni su to nagradit. ja sam roker, ali mi leže balade, a djevojka koja je pjevala sa mnom, Ana Petan, pjeva izvanredno, tako da smo u duetu nepobjediva ekipa! Ovo je predivan festival, pa sve jedno s drugim kad uzmeš, ova godina je naša, i to je to! Konkurencija je bila stravična – puno dobrih pjesama, puno mladih pjevača, a ovdje je podijedila kombinacija iskustva i mladosti! Sad slavimo i to je to!“, rekao je zaRadio Tivat legendarni Dado Topić.

Mlada Makedonka Ana Petan je prezadovoljna uspjehom i presrećna zbog učešća na festivalu.

„Saradnja sa Dadom je počela prošle godine u Ohridu negdje u ovo vrijeme. Upoznali smo se preko naših PR timova, jer je on u Ohridu imao koncert, i onda smo izveli Princezu. To je bio jedan veliki momenat za mene i tako je počela saradnja. Rođena je ideja za naš duet. Tekst za ovu pjesmu je malo apstraktan i jako intiman, ljubavni, emotivna je. Dado je poznat po tome da te baš dirne kad napiše pjesmu, svi mogu da se povežu sa njom, jer je univerzalna. Lijepo je da se izvede kao duet, jer žena priča svoj dio, pa muškarac svoj, i onda se spoje u refrenu. Na festivalu je bilo puno odličnih izvođača, a svi su dragi ljudi i imala sam zadovoljstvo da ih upoznam. I glasovi i kompozicije su kvalitetni, ima i različitih žanrova, ali je poštovan standard ispod koga se nije moglo ići,“istakla je Ana Petan.

Drugo izdanje RMF Biser Jadrana pokazalo je daleko viši nivo i donio daleko kvalitetnije pjesme u odnosu na prošlu godinu, kao što je organizator, NVO “Delić koji nedostaje”, odnosno muzičar Bojan Delić, direktor festivala i obećao, a sama scena na Ljetnjoj pozornici Tivćane može činiti ponosnima.

Voditelji festivala bili su Antonela Martinović, Maja Kovačević i Dušan Kovačević, piše Radio Tivat.